TIKI-TAKA-KURS SUNDAG 14. MAI

Det er med stor glede vi i Breimsbygda kan meddele at Rune Mikkelsen kjem til Byrkjelo for å halde kurs i tiki-taka. Kurset er gratis for alle medlemmar av Breimsbygda IL. Kurset startar kl 17:00 og varer fram til om lag 20:30.

Rune Mikkelsen er ifrå nord. Han har mange års erfaring med utviklingsarbeidet som føregår på La Masia, treningsanlegget til FC Barcelona sine unge, lovande. Han har i mange år drive fotballakademiet TIKI-TAKA fotballakademi. Underteikna har fulgt han i fleire kanalar på sosiale media gjennom mange år - med stor iver. Då han meldte at han skulle ut på turné i Sør-Noreg (alt sør om Nordland fylke er for sør å rekne for ein nording) var underteikna snøgg med å tinge han til Byrkjelo.

Intensjonen er ikkje at Breimsbygda skal bli som Barcelona. MEN Rune Mikkelsen tek føre seg ein metode han kallar SKRIFT-modellen som han vil gjere greie for. Han er oppteken av individuelle ferdigheiter.

SKRIFT er kort fortalt:
S - SAG - (Sjå, analyser, gjer)
K - Kroppstilling
R - Riktig fot (spele på)
I - Ifrå / imot (rørsle)
F - Førstetouch
T - Ta av press

Programmet vil sjå omtrent slik ut:
17:00-18:00 Teori
18:15-19:15 Praksisøkt med Breimsbygda G11
19:30-20:30 Praksisøkt med Breimsbygda G13/14

Kurset er gratis for alle Breimsbygda sine medlemmar. Du treng ikkje ha eit verv i fotballen for å vere med. Det er ingen av deltakarane som skal i elden og bevise noko. Ein kan kome, sjå, lytte, suge til seg kunnskap og ta notatar.

Stadionbygget sundag 14. mai frå kl 17:00 er staden å vere.